英國嘅天空電視電影台最近搞咗個英國最性感男星選舉，由當地嘅女觀眾投票，結果係由演過《魔戒》系列同新片《木馬屠城》嘅奧蘭多布魯（OrlandoBloom）勝出，打低咗祖迪羅（JudeLaw）等靚男前輩成為冠軍，證明佢已經深受英國女士嘅愛戴。
雖然我大口羅拉睇過《木馬屠城》，覺得呢位現年二十七歲嘅奧蘭多布魯入面嘅角色，係芸芸男演員之中最唔討好嗰個，不過，啲英國女士依然俾佢嘅樣貌迷倒，將佢選為英國最性感男星。
而同奧蘭多一樣演出過《魔戒首部曲》同《木馬屠城》等西洋古裝片嘅四十七歲影星辛賓（SeanBean），亦爆冷跑出成第二位，估唔到呢位冇乜八卦新聞嘅實力派演員，其實喺英國女觀眾心目中係好夠男人味㗎。
至於今年四十三歲嘅鑽石王老五曉格蘭特（HughGrant），仍然人氣強勁，重可以躋身喺三甲之列。而第四同第五位先至輪到嚟自蘇格蘭嘅伊雲麥葵格（EwanMcGregor）同埋大熱嘅祖迪羅（JudeLaw）。啱啱做咗新一代蝙蝠俠嘅基斯頓比爾（ChristianBale）就排第六位。
對於呢個賽果，電視台發言人就話：「以前呢個選舉通常都係由祖迪羅同伊雲當選，睇嚟奧蘭多真係冒起得好勁！」