停牌成年，原本叫做彩虹國際嘅變靚D控股（8079）噚日復牌，一如好多長期停牌嘅股份，復牌股價急挫，最低見過1.6仙，收市報4.3仙，大跌42.7%，走勢都幾肉酸。但奇就奇在變靚D成交量唔算大，成交股數只有685萬股，金額29.5萬元。
經紀陳話，講開就真係一匹布咁長，話說彩虹在數年前上市，持貨者大部份都係相熟嘅友好人士，重要係坐親都大大手嗰種，直至停牌前都一路冇變。
隻股停牌咁耐，出現好多變化，連大股東都變咗才子嘅屋企人。家陣公司改咗個咁有創意嘅名，揸咗貨嘅友好人士，都想睇吓隻股係咪真係會變靚D。據講噚日唔沽貨嘅人士，主要係憧憬新主會有後着。
另外，經紀黃噚日推介利福國際（1212），點知撞正大市勁跌逾300點，隻股亦急跌7.4%，收8.80元，認真唔好彩。
經紀黃話，隻股跌得咁急真係估唔到，因為噚日有間歐資行出報告，推介多隻估計會繼續受惠於自由行嘅零售股，而利福亦係推介對象之一。
慕容小初