歐國盃終於開鑼，一共十九個晚上三十一場比賽，全部在深夜開波。球迷要捱更抵夜睇波，還要邊睇、邊喝啤酒、吃薯片，結果傷神兼傷身。
要睇波睇得健康，健身教練Utah教你幾招「睇波健身法」，一邊睇波，一邊做運動，可令你翌日上班時感覺好得多。真的是「話咁簡單」的伸展運動，今晚可以試一試，看看會否不一樣？
文：徐嘉華
圖：李家皓
除了做運動外，睇通宵波亦有其他「睇得健康」的方法，好似勞永樂醫生提議的「以水代酒」、「以生果代零食」及「錄影部份球賽」；而浸大助理教授雷雄德博士建議「彈性上班」、「提早睡眠時間」都值得球迷參考。
自言是英格蘭球迷的雷博士，會將睡眠時間提早，放工後，吃過晚飯，大約晚上九時睡覺。以昨晚為例，十二點那一場的比賽並不是非看不可的，他會選擇錄影，到凌晨二時四十五分才起床看英格蘭對法國的直播。他解釋說：「捱夜好傷身，一方面身體抵抗力會變差，另一方面會影響體溫調節，容易患上感冒。另外，每一個晚上兩場波，三個小時，一定會食東西，食完又沒有消脂的方法，會導致肥胖。」
「所以，我會建議不要坐定定睇波，睇得開心，可以手舞足蹈一番。想有足夠睡眠，可以同上司建議彈性上班。」
勞醫生則提醒球迷們啤酒及汽水是「致肥」飲品，而咖啡、濃茶則是「提神」飲品，使人在觀看球賽後難以入睡，所以不宜多飲，最好以清水代替。零食如薯片、花生、糖果並不健康，只會令身體多了不需要的鹽、糖及脂肪質，最好以生果、乾果及無糖香口膠代替。
