雖然近排零售股唔算當炒，但有隻零售股卻在近日創下上市新高，就係揸住銅鑼灣崇光嘅利福國際（1212）。
經紀黃話，利福股價靚仔當然事出有因，一來隻股主要由芬佬坐住，二來大戶又相當惜貨，只要有心人肯支持，股價自然愈挾愈高。
利福喺今年4月，以每股8.30元招股上市，由於當時市況唔多好，受注目程度自然一般。5月上旬，港股淡友最後一擊，所有股票皆跌時，利福股價一度跌至7.10元，令閒雜人等的貨源大部份嘔晒出嚟。由於利福從未真正大炒過，所以街貨好易數得齊，一旦收齊貨，自然可以如入無人之境。
利福上周五最高見過9.65元，收9.50元，升2.7%，成交股數369.6萬股，金額3787.8萬元。經紀黃重話，按目前走勢，就算利福升穿10元，佢一啲唔覺得出奇。
另外，小初以往愛股之一嘅蜆壳電器（081），早前創辦人仙遊後，最近又有新聞，傳聞有風扇產品在美國需要回收。唔怪得平日冇乜成交嘅蜆壳．上周五股價突然急跌8.7%，收1.68元。
慕容小初