張惠妹因為俾內地嘅大學生話係「泛綠歌手」，所以成為內地反台獨民眾嘅針對目標，前晚佢喺杭州演出，因為有民眾示威，嚇到阿妹連酒店房門都唔敢出。呢件事喺台灣引起迴響，噚日有唔少網友揚言要以同樣嘅手法，抵制內地歌手那英同埋喺北京出世嘅王菲，叫大家唔好買佢哋嘅唱片，替台灣歌手出番啖氣喎。
阿菲嘅歌迷就抗議話咁做唔係辦法，冤冤相報何時了，況且件事都唔關阿菲事，咁做好唔公平。王菲嘅經理人邱王黎寬話阿妹被抵制件事已經夠誇張，如果將阿菲都扯埋落水就太離譜，佢強調阿菲對台灣感情好深，向來不問政治，台灣「九二一賑災」，阿菲重捐咗一百萬新台幣（約二十三萬港元）。
張惠妹噚晚八點返到台灣，對於被內地反台獨民眾抗議嘅事，佢話：「很難過也很沮喪！」佢又激動到眼泛淚光話：「藝人很多工作不是自己能做主，不過有了這次經驗，往後我會更加謹慎。」阿妹話希望可以照原定計劃做王力宏喺上海演唱會嘅嘉賓。
歌神許冠傑復出演唱會飛熱賣，十場飛一日賣晒，佢嘅舊拍檔張艾嘉前晚睇電影《浮生若舞》首映場，都呻話買唔到飛，佢話：「佢真係唱得好好，應該出番嚟唱歌，不過我都買唔到飛，所以冇得去睇！」相信歌神聽到，都會私人醒幾張佢睇啩！
官恩娜前晚喺灣仔，同來自巴黎嘅樂隊GotanProject夾band，負責打鼓嘅官恩娜無端端話想吹band友支笛，不過佢費事間接同隊友kiss喎。佢噚日出席活動時提到許冠傑（Sam）喺演唱會咀佢，又讚佢個嘴又濕又軟，官恩娜話：「咁多晚都錫面，阿Sam伸到個嘴埋嚟，都冇得避啦，呢個係『神的一吻』。」
