港股上周升穿50日線（12107），並能守穩其上，待20日線（11872）穿過50日線後，上月17日的低位10918即可確認為中期調整浪底，大市升浪持續，短期可上到13500至14000，中期目標指向16000至18000。
噚日同一眾好友茶敍，大部份係芬佬，佢哋基本上都睇好後市，有一位對圖表走勢鑽研幾有心得，佢話呢個市會起到8月中至9月初，有機會重遊3月初的高位，不過路途會幾反覆，𠵱家先升藍籌同國企，二三線股大圍就要到半路中途先接力，高潮過後，會出現一次較大幅度的調整。
佢強調，下半年呢個波幅玩得過，家下向上望有千幾點水位，第日向下亦會有千幾二千點，玩多兩轉，然後再部署，迎接05年嘅大升浪，樂觀估計可見18000。
樓市由低位回升已大半年，由於升幅唔細，起碼幾十個巴仙，個別豪宅的升幅更逾1倍；所以，呢段時間整固一下好正常，但樓市已確認見底，後市會反覆向好。調整完之後，估計下半年會升多1成，明年會再升1或2成。
富豪酒店（078）係樓市回升嘅大贏家，赤柱富豪海灣熱賣，已售出近90間洋房（平均呎價11000元），套現約40億元，已可悉數償還項目貸款。由於財況大為改善，餘下50間洋房，已唔急於求售，家下港島南區豪宅呎價去到15000至20000元，餘下洋房最少可再套現30億元。富豪佔項目7成權益，保守估計獲利逾25億元。富豪重有酒店業同其他地產項目，成家公司嘅市值，都只係得19億元而已。
酒店業好景，富豪亦決定唔賣九龍城的富豪東方酒店，富豪寧願賠訂，主要就係自由行之後，好似富豪東方呢類中價酒店，都唔知幾吃香，日日爆棚，租出率100%。富豪家下係本港酒店最大經營者，估計今年盈利又有億餘元。
富豪上周五走勢出現突破，一舉升穿下降軌阻力，以量度升幅計，目標指向0.4元。03年底，富豪每股資產淨值0.54元，加上回撥及旗下酒店升值之數，每股淨值有0.95元，就算大折讓60%，股價都可見0.38元！另外，富豪10送1窩輪，認股價0.25元，日後肯定賺到笑。
郭兆誠