回歸之後，大學畢業生搵工不易，早已不是秘密。大概因為一來大學之間，競爭激烈；二來各大學要揚威，刺激學生士氣，所以要大肆宣傳新畢業生人工高、工作好，潛台詞就係我校學生精叻醒目能幹、教授威猛，在商界聲譽高，中學啲尖子，唔該快來申請入學。
公關P介紹一位世姪來問：「科大已經收我讀環球商業系，LSE亦取錄我，但要等ALevel放榜；我已拒絕USC，請問點揀先至對我最有利？」左丁山考慮到佢嘅志向，建議佢去LSE（倫敦政治經濟學院），如果唔得，就揀番科大，理由不便透露，不過後生仔自有主張，能獨立思考，未必聽老鬼講。
同佢講完，見到報紙大篇幅報道科大環球商業系三位畢業生搵到好工，其中一位女將入咗GoldmanSachs做分析師，好巴閉咁話，唔知公關P位世姪會唔會因此認為左丁山唔識嘢呢？騎騎，讀乜學校都好，最緊要靠自己，科技大學以科技為名，以MBA及環球商業系揚威，真估唔到。
我哋讀書年代，大學生求過於供，搵到工似乎理所當然，學校從來唔宣傳。計我話，啲美資大行請人艱難，炒魷容易，每次吹淡風，都擒擒青炒一批人，所以入到去，固然值得恭喜，但唔值得大書特書，過份宣傳反而對畢業生冇好處。基金經理H曾在高盛工作多年，佢嘅忠告?做事格言就係：威風時不要太高調。新入行者，不妨謹記。