大導演吳宇森已經進軍荷李活發展，作品多不勝數，不過講到老影迷最印象深刻的電影，《喋血雙雄》同《喋血街頭》兩套喋血系列，都必定可榜上有名。
吳宇森曾講過，《喋血雙雄》有點現代武俠嘅味道，故事圍繞宿命英雄發展；後者就係吳最個人化嘅電影，有唔少情節係根據吳年少時嘅故事而寫。
雖然故事唔同，不過都帶有強烈吳宇森風格，巧妙運用慢鏡，加上劇中演員影帝級功力，呢套《喋血》BoxSet絕對係極品珍藏。
記者：許福合
洲立影視發行 電話：24188827
一套成功電影，導演當然功不可沒，而演員嘅發揮亦相當重要，喺《喋血》系列中，就集合咗多位演技派天王，除影帝級嘅周潤發、梁朝偉同任達華外，重有張學友、李修賢等，可謂演技大鬥法，淨係睇演技已值回票價。觀眾除咗睇到導演製造嘅緊張場面，全片使用最新數碼修復技術，畫面質素極高，加上dts環迴聲效，恍如置身於槍林彈雨中。
職業殺手小莊（周潤發飾）因為一次行刺任務中誤傷歌手珍妮（葉蒨文飾），令她雙目失明。小莊內疚非常，決定受聘暗殺黑社會大佬汪東源，以籌錢將珍妮送到外國就醫。同時警員李鷹（李修賢飾）正調查追捕犯下唔少大案嘅小莊。調查過程中深入認識到小莊，發覺他為人講義氣，故大為改觀。黑幫老大（成奎安飾）想將小莊殺人滅口，小莊正煩惱如何送珍妮出國求醫，李鷹於是決定同小莊一齊對付黑幫老大。
《喋血雙雄》係吳宇森受賞識從而進軍荷李活嘅代表作，能與《英雄本色》看齊甚至超越。開頭一段就已經似曾相識，容易令人回想起周潤發「獨行殺手」嘅Mark哥形象，成為此片重心。吳宇森當然使出招牌招數，如慢鏡頭、兩手射擊等，令畫面更「型」。另外鏡頭運用亦值得一讚，使用高角度、低角度、鳥瞰角度與慢鏡頭，將發哥以一敵眾嘅場面，拍得異常真實，令電影震撼性提高至頂點。
故事背景設於一個動盪六十年代，三位男主角阿B（梁朝偉飾）、輝仔（張學友飾）和細榮（李子雄飾），因與黑幫結下仇怨，被迫走佬到更動盪的越南，展開大逃亡。與吳宇森電影一樣，男性情誼係《喋血街頭》的一大主題。於越南暴亂中，三人被軍隊逮捕及盤問，更被迫殺人，展現咗人性邪惡嘅一面。《喋血街頭》對人性戰爭嘅描寫，令人睇得有啲唞不過氣，亦有唔少係導演想表達嘅深層意義，有極為強烈嘅吳宇森作品風格。
DVD版電影都會有特別收錄內容，通常都係訪問或預告等，呢次《喋血》BoxSet除劇照之外，就分別收錄兩輯《槍械實戰解碼》，當中會揭開槍林彈雨下嘅生存方法及狙擊必殺技，亦會講到如何遠程暗殺、救命煙幕等，內容都算特別。
今個星期舊片當道，有唔少正片翻新推出DVD版，除咗《喋血》系列外，《英雄本色》亦會推出BoxSet，重一次過收錄三集經典《英雄本色》I、II、III電影，DVD套裝更會附上吳宇森親筆撰寫嘅「英雄情書」，可一集集重溫番經典作品，Fans必定值得珍藏。
DVDPro（23326326）
