近來談到李彩樺（Rain），總會與蕭定一的名字掛在一起，然而阿Rain仍只承認蕭定一是信得過、乜都傾的朋友，原來她怕圈內人花心，沒辦法給她安全感，對於未來，阿Rain的願望是三十歲嫁人，退出娛樂圈然後生兒育女。
李彩樺近來的感情生活似乎多姿多采，繼早前傳與丁子高拍拖後，近日與蕭定一的緋聞又傳得鬧哄哄。有報道指二人在的士內親吻，及後阿Rain又被拍得陪蕭若元及蕭定一父子往傾生意，然後一同返家，阿Rain照例否認，還聲言只會與圈外人相戀，而她對將來的憧憬是：「三十歲結婚，嫁畀個圈外人，然後退出娛樂圈轉行，再生一仔一女咁就最perfect喇。」
阿Rain與蕭定一於合作《功夫足球》時認識，當時蕭定一任監製，她對蕭定一稱讚有加：「我識咗佢將近一年，佢教我點喺圈中待人處事，有時我拍嘢佢會嚟同我傾偈，我哋乜都傾，暫時我都覺得佢係信任得過嘅朋友。」然而阿Rain仍否定雙方的戀情，她說：「我哋只係朋友，佢唔係我想要嗰種，我心目中梗係要靚仔啦，而且一定要係圈外人，圈內人好花心，雖然專一嘅都有，好似張智霖、張學友咁，但圈內咁多靚女，我會好擔心。」
其實阿Rain入行至今，認真傳過緋聞也不過三人，其中她與林峯便是外間認定曾拍拖的一對。
早前阿Rain曾就林峯整容的傳聞揶揄對方，阿Rain說：「我都唔係話佢啲乜，佢冇咁小器。唔理乜嘢新聞，你答得愈嚴肅咪愈沉重？輕鬆講吓笑咁咪過咗去囉，好似去歡樂天地咁啫。我同佢少聯絡，我好被動，佢唔打畀我，我就唔會搵佢。」
阿Rain也曾傳與丁子高過從甚密，引來丁子高女友Zoie呷醋，阿Rain坦言：「起初我feel到佢真係有少少追我，但佢同Zoie一時又話分咗手，一時又話唔係，我唔想愈搞愈亂，都係保持距離好啲。」
阿Rain現時只得二十歲，依然青春，故她不會為任何一個緋聞男友哀愁半刻鐘，她說：「就算真係男友，都未必係將來嘅老公，唔值得唔開心，呢方面我睇得好開。」所以她將親情放第一，再來是事業和友情，最後才是愛情，她說：「我唔係勁想結婚嘅人，我重咁細個，結咗婚後一世流流長點過？算命話我三十歲前會嫁，但緣份好難講，不過三十歲都好啱時候。」
採訪：蔡如育
攝影：仇志德
髮型：Zing@HipHairCulture
服裝：A/X
