香港社會有兩個良心，成日提醒市民乜嘢係值得驕傲嘅香港核心價值，一位係前任政務司司長陳方安生，另一位就係天主教香港教區主教陳日君，陳太早排喺《時代》周刊撰文，字字珠璣、發人深省，噚日就輪到陳主教喺人權新聞獎頒獎禮上，講人權同新聞自由。
陳主教剛剛由台灣返港冇耐，但佢一樣對香港時局發展跟得好貼，喺頒獎禮上致辭時，陳主教除咗呼籲傳媒工作者繼續捍衞新聞自由同人權，揭發社會上對弱勢社群嘅不公平情況之外，又為陳太喺《時代》周刊篇文叫好，佢話三年前寫咗一篇講反對人大釋法剝奪居港權嘅文章，人權新聞獎主辦單位頒咗個人權勇氣獎畀佢，可惜當時佢唔喺香港，今年「六四」十五周年天主教祈禱會，佢篇講詞將今年人大釋法比喻為「不流血『六四』」，陳主教笑笑口話唔想因為呢篇文章再攞呢個獎，但陳太最近就講咗好多有勇氣、捍衞港人嘅說話，呢個獎應該頒畀陳太。
兩位香港良心惺惺相惜，同樣敢講真話，得到香港人同世界人士嘅尊重，同嗰班成日叫香港人愛國嘅土共比，用飛哥贈曾鈺成嗰句，真係唔同級數！
傳真︰2623-9278
電郵︰