李彩樺十六歲入行簽約金牌經理人黃柏高（Paco），就藝人來說幾乎可以用「含着金鎖匙出世」來形容，可惜她近年成績不及想像的好，但阿Rain表示沒有灰心，反而發憤向着原本的目標進發，而且仍希望一嘗「最受歡迎女歌手」的滋味，阿Rain說：「啲人成日問我，話我初出道時好似好勁，𠵱家點解咁？我𠵱家都唔係好差啫，唔好你哋自己期望我會係點，然後就話我唔得。每個人有每個唔同階段，呢幾年係我打穩基礎嘅時候，鄭秀文都係好細個入行，都磨練過㗎。」
阿Rain謂她從未放棄自己的目標，她說：「我未入行前睇電視，見陳慧琳攞最受歡迎女歌手，佢喊晒咁好感動，我就諗我攞會係點呢？我會係史上喊得最誇張嗰個，我重諗定要多謝邊個。呢個目標我冇再同Paco提過，我相信佢會幫我，我簽佢時，佢叫我放心，一定會捧紅我，如果我唔紅唔係我冇面，係佢冇面！所以我仍然好相信佢。」
阿Rain表示她沒有後悔加入娛樂圈，因為她信凡事皆注定，她說：「我都有諗過如果冇入行，可能會做時裝設計或者空姐，但𠵱家知空姐好辛苦，我有啲同學讀完時裝設計，都唔係做番嗰行，所以整定嘅。」入行四年讓阿Rain成熟不少，她說：「我冇以前咁鍾意計劃啲嘢，今日唔知聽日事，我做好今日嘅嘢，聽日嘅留番聽日去做，或者我聽日死咗呢？諗太多好辛苦，我情願儍吓儍吓咁過日子。」
阿Rain現在最期待九月出新碟，她謂：「我上年拍咗三齣電視劇，拍劇入屋嘛，𠵱家係時候出番碟，呢啲都係Paco安排好嘅。拍劇係好辛苦，不過我識咗個好朋友陳敏之，大家好啱傾。拍完劇，我發覺自己重好鍾意唱歌，以前上台都驚，𠵱家希望畀我唱多幾首。」
