自從教統局推出「求學不是求分數」宣傳口號，唔少家長都投訴話逢親叫仔女讀書，佢哋就用呢句頂返轉頭。兩個應屆名校會考生，噚日喺家校會（教統局官方諮詢組織）嘅十周年活動上以棟篤笑手法諷刺「求學不是求分數」呢句口號，贏得唔少家長掌聲。
英皇書院中五生謝兆聰同喇沙書院中五生馬兆鏘話𠵱家大學有尖子計劃，北大同清華又嚟香港招生，講明申請條件要幾多個A，「會考冇咗一分，就可能冇咗個A，頭先講咁多計劃都冇份。」
謝兆聰話，要應付會考好辛苦，「已經讀到好㷫好躁，突然電視播嗰句口號出嚟，你話點呢？」馬兆鏘就話，「屋企晚晚為呢句話鬧晒交，阿妹唔做功課，話求學不是求分數喎。」佢之後話只係講笑。兩人都覺得教統局應改為「求學不只求分數」，咁咪好好多。
（圖）謝兆聰（左）同馬兆鏘一唱一和，令家長們捧腹大笑。
傳真︰2623-9278
電郵︰