俄羅斯近期爆咗隊性感女子組合NuVirgos，佢哋已經取代咗啱啱改名做t.E.m.A.嘅t.A.T.u.嘅地位，成為俄羅斯最受歡迎嘅女子組合，不過，由於佢哋個MV太過性感同大膽，所以喺本地遭到禁播。
由Vera、Anya同Nadja三位烏克蘭靚女組成嘅俄羅斯組合NuVirgos，最初個樂隊名原來係叫V.I.A."GRA"，個名因為同一治陽痿藥物偉哥（Viagra）相似，所以上年俾偉哥禁用咗個名，要改為NuVirgos進軍國際樂壇。
不過，聽聞偉哥知道NuVirgos開始上位之後，又突然主動想同呢班女子合作喎。
而NuVirgos進軍國際嘅第一首歌曲《Stop!Stop!Stop!》，原來已經畀蔡依林改咗成國語歌叫做《LoveLoveLove》。講到佢哋首歌嘅MV就巴閉嘞，佢哋三個靚女着住套好似古羅馬性感女神嘅服飾，重不停做出啲好挑逗嘅動作，保證令大家大開眼界。
唔單止咁，佢哋個MV意識極之大膽，好似食雪糕同男女親熱嗰幾幕，都打咗格仔，大大增加咗畫面上嘅意淫味道，更令人想入非非，搞到本地電視台覺得個MV拍得太過出位，惟有禁播個MV。不過，NuVirgos聽日喺本地推出嘅新碟《Stop!Stop!Stop!》入面，就加送埋呢個MV嘅VCD，等大家可以慢慢欣賞。