行過報攤，見到《壹週刊》封面大字標題：「滙豐出招，恒生大清洗」，以為有乜特別料，急急買一本返公司睇，一睇之下，原來冇料到，笑一笑，送咗本雜誌畀秘書。
壹仔挖番舊事，講歐肇基與壽明。歐肇基早已自星洲返港，左丁山喺皇后大道中碰過佢幾次，歐總身穿便服，不結領帶，狀甚輕鬆。至於壽明呢位前恒生銀行總經理嘛，大家都知道佢仍在赤柱服刑，為昔日受賄付出代價。
有咁啱得咁蹺，中午吃飯之時，碰到一位知道赤柱消息嘅人士，佢又係睇完《壹週刊》嘅封面故事，話題自不然去到壽明，呢位赤柱消息人士話：「真係人生如夢，夢醒時身在獄中，試問有何感想？不久之前，一位太平紳士?高官巡視監房，剛好碰到壽明，佢識咗壽明好耐，昔日大家都係咁高級，互相尊重，點諗到多年不見，再碰頭竟在監房，高官與壽明打招呼之後，十分感慨也！」
聽佢講，壽明在赤柱內，參與特區政府高官嘅名片印製工作，赤柱囚犯都有工做㗎，懲教署設立部門，專接政府外判工作，賺錢之外，亦等囚犯學習一些工藝，令佢哋有啲忙碌感，唔好覺得太空虛。唉，做賓架，最緊要謹慎行藏，避免瓜田李下之嫌，呢行牽涉到太多金錢，太多現在與將來嘅利益，賓架成日幫人發達，助客戶賺錢，自己就靠份人工、花紅，一下眼光淺，就好容易中招，泥足深陷。