瑞銀證券一向睇低八號仔電盈，三年來都唔推薦客戶買呢隻股票。點知最近與電盈管理層見面後，立即出報告，推薦客戶買入，目標價係六個半，而且會今年首次派息，息率估計有四點九厘（以造價五個二計）。報告一出，八號仔喺星期四立即升四毫（七點四七巴仙）至到每股五元七角五仙，顯見瑞銀推薦，頗有威力。
小華曾經想喺四個九嘅水位買入電盈，但個心又驚，冇買到。今次見到瑞銀推薦，又試心郁郁，想話追入，但股價去到五個半之時，心情矛盾，卒之唔敢打電話叫經紀入貨。小戶心情就係咁㗎啦，股價跌時唔敢撈底，股價升時唔敢高追，都唔知乜嘢時候入市最啱。我哋永遠冇法子把握、掌握到最適當嘅入市時間（即係今天買入，明天立即飆升，或者係買入之後，股價從來唔會跌到買入時嘅水平），買股票只能看基本分析，研究清楚隻股票是否有能力、潛力不斷增長（如滙豐）。
小華記得以前睇過「壹仔」投資專家東尼嘅意見，東尼話電盈資產淨值七蚊一股，如果東尼與瑞銀都睇得準、睇得啱，電盈股價咪豈非會升番十七至二十七個巴仙？有冇咁筍呀？小華竟然以此考左丁山，幾乎俾佢考起，只能夠對佢講，瑞銀與東尼都唔會係亂說話之人，一定曾經做過一番研究，何況重有一個bonus，就係如果網通洽購電盈固網之事傾得掂，電盈前景露出曙光，似乎有值博率噃，睇吓小華有冇耐性及定力啦。