早排KONAMI先出咗隻《F.D.18》玩救火，估唔到話咁快又輪到irem玩多次，推出人氣漫畫改篇嘅《櫻坂消防隊》。呢隻Game由《R.Type》及《絕体絕命都市》開發商製作，由故事性到玩法，均比《F.D.18》更為優勝，兩兄弟一邊大嗌一邊勇闖火場，充滿熱血Feel之餘，重要不斷轉動腦筋，諗計縮短搵路時間，救人救火夠刺激！
記者：徐影龍
呢隻Game由漫畫《櫻坂消防隊》改篇，之前玩過《F.D.18》，對呢類救火Game未抱太大期望。不過玩落之後，發覺遊戲系統實在做得出色。首先玩家並非揸住支水槍噴熄啲火咁簡單，就喺第一話嘅熟習期，已經要求玩家搵電門開關、劈開路障、推櫃等指令，千方百計消除各式陷阱，目的係盡快搵出條救人路線，而且重不時搵到一啲跟火災有關嘅道具㖭，感覺就如玩緊救火版《生化危機》咁，不過對「用腦」要求更大，玩落又幾過癮喎。
遊戲流程係趕到火災現場後，署長堀越隆雄就會發出指令，亦即該話嘅任務，如救人定救火為首。闖入火場後，會發覺好多路都唔通，需要即場諗計解決，如繞路開啟電門、先解決火源（猛火源頭）等，其間亦會不斷有新Order畀你，失驚無神話有個社長困喺宿泊屋、某OL唔知喺邊度求救等，總之就要你疲於奔命，兼且時間非常有限，須不斷完成小事件增加TimeLimit，若你只懂儍乎乎見火就射，就肯定等GameOver都得喇。
當然唔只得你一個人沖入火海救人，咁罔顧現實嘅英雄主義，遊戲入面有多種增援部隊及隊友俾你指揮，首先要靈活運用跟你嗰兩三個隊員，如派佢哋先滅火開路，自己就繞路上樓上開門畀隊友，可大幅節省開路時間。若遇到猛火源頭，更要Call齊班兄弟齊齊噴水先得，得一條友就算射一日都救唔熄堆火。除貼身救火嘅隊友外，重有好多唔同種類嘅支援，如幫你及同伴回復HP嘅急救隊、幫你快速滅火嘅巨型噴水車等，都要好好利用。
故事性強亦係值得推介原因之一。雖然港人對《櫻坂消防隊》漫畫不太熟悉，比《消防員的故事》弱得多，不過從遊戲中所感受到嘅故事內容，亦算幾吸引，起碼包含晒兄弟、男女、師徒、宿敵、摯友等感情元素，而且故事跟遊戲配合得幾好，尤其係兩兄弟一齊上火場救人救火，再拍住班各有特色嘅同伴，玩落十分有「兄弟班」之感覺，成功令玩家全情投入。
試玩後話：
呢隻係繼《機戰MX》之後，令筆者一玩再玩嘅好Game。遊戲難度不低，每每需要喺熊熊烈火之下，冷靜思考下一步，非常之緊張刺激。各種隱藏模式（包括2人協力、對戰模式），以及Gallery等項目，均要攻破某程度關卡先玩到，加上喺火場努力搜集大量遺留品，作破解縱火兇徒嘅線索，從而令結局出現GoodEnding，令人有一玩再玩嘅吸引力。
抵讚： 救火場面設計用心，須運用縝密心思破關，出色劇本亦令投入感大增。
要彈： 難度不低，操作亦頗複雜，幾乎用盡全個DualShock2所有按掣。
遊戲類型：動作＋解謎
對應機種：PS2
遊玩人數：1至2人
行貨售價：$415
開發商：irem
(C)2004IREMSOFTWAREENGINEERINGINC.Allrightsreserved.
