呢排新聞多，不停勁sell納米概念嘅佑威國際（627），股價節節上升。究竟佢檔納米有幾正，小初真係唔清楚。經紀陳點醒小初，話佑威早排配售嘅認股證，如無意外，將在本月24日正式買賣。
經紀陳又話，近排佑威股價勁升，揸住批股證嘅投資者，帳面獲利甚豐，但據講呢批股證冇乜點流出街，所以佑威累積升幅雖大，但在該批股證正式掛牌前，估計正股股價仍然守得住。
佑威在5月中時公布，按每份9.7仙，配售2.59億份認股證，集資約2420萬元，當時暫定認購價每股0.20元。當時佑威股價喺0.30元樓下，噚日佑威再升3.75%，收0.415元，就知道呢排隻股升幅有幾勁。
另外，好耐冇炒過嘅華豐紡織（364），近日成交顯著大咗。經紀陳話，華豐於6月18日公布中期業績，聽講見得人有餘，加上華豐現價比2月高位，跌幅仍大，唔排除有炒家會借機炒一轉業績。華豐噚日升1.2%，收0.83元。
慕容小初