喺演藝界打滾咗接近三十年嘅荷李活老牌女星梅麗史翠普（MerylStreep），前日喺洛杉磯獲美國電影學院（AFI）頒發終身成就獎。現年五十四歲嘅梅麗，成為史上第三十二位得到呢個被譽為荷李活演員最高榮譽之一嘅大獎，佢亦係第六個攞到呢個獎嘅女星，真係威水。
梅麗曾經十度提名奧斯卡影后、三次提名奧斯卡最佳女配角，佢亦憑八二年嘅《蘇菲的抉擇》以及七九年嘅《克藍瑪對克藍瑪》分別得到奧斯卡影后同奧斯卡最佳女配角，所以今次佢攞呢個獎可算係實至名歸。美國電影學院重發聲明讚梅麗話：「梅麗史翠普係美國電影史上其中一位偉大演員，佢嘅才華同專業精神，係得到我哋演藝界嘅認同。」
當日梅麗攞獎嗰陣，佢鮮有露面嘅老公同四個仔女都盛裝出席，認真溫馨。而佢演藝界嘅老友，好似高蒂韓（GoldieHawn）同男友卻羅素（KurtRussell）、占基利（JimCarrey）、羅拔迪尼路（RobertDeNiro）以及出爐金像影后查理絲泰朗（CharlizeTheron）都有到場向梅麗致敬，其中查理絲更加真空上陣凸點贈興，不過主人家梅麗亦唔輸蝕，佢好罕有咁着緊身衫谷胸上陣，都未至於俾查理絲搶晒鏡。