香港興業係大嶼山大地主，東涌及愉景灣都有發展，去年十二月，佢哋為愉景灣打造新形象，同新思維，設計出新標誌，叫Dbay，不斷大賣廣告，市場人士原以為香港興業目的係為促銷樓盤，但一直唔見動靜。
蘭西噚日收到香港興業邀請，下周一坐直升機，從空中睇愉景灣與迪士尼等地點最新面貌，之後香港興業會介紹愉景灣未來發展大計。除咗傳媒經常接觸嘅發展及市務部總經理陳子明，集團董事總經理查懋成都會出席。香港興業愉景灣仍有幾期發展，今次推介，又會引起市場猜想，遲啲會有銷售攻勢，究竟係咪，到時就有分曉。
世界盃期間，有大電視轉播嘅商場及酒吧，人山人海，商戶生意大增。
今日歐國盃開鑼，又係零售商黃金日子，地鐵總商場市務經理陳嘉明話，為咗針對顧客鍾意睇波，旗下青衣城，明日開始在大堂放置九乘十二呎大螢幕，轉播球賽。果然係吸引消費者嘅好方法。
另外，今個月又係父親節，地鐵四個商場，都有優惠活動。陳嘉明話，推廣費過百萬。
地鐵商場係以底租加分成定租金，商戶生意愈好，地鐵的租金收入就水漲船高，所以一於多搞活動。
劃為行人專區嘅旺角西洋菜街一帶舖位，更得益於自由行嘅刺激，價錢一直水漲船高，部份區內做生意嘅老闆，忍唔住手，買番個舖收租。好似電訊數碼主席張敬石，啱啱用三千二百六萬，買入西洋菜街1A至1K百寶利商業中心六號地舖，二五○呎，每呎十三萬四。
舖位由米蘭站承租，每月十四萬八，回報五厘四。喜來登引述張氏話，自己對嗰區好熟，睇好呢條街舖市前景，趁早買嚟投資。
個舖呎價十三萬，但相對附近星際城市舖王差好遠，舖王呎價二十三萬六。
港人內地置業熱潮未退，但對於內地樓市走勢分析則不多見，蘭西睇到廣告，今日有個「置業深圳專家點睇」分析講座，由「深圳城天地廣場」呈獻，請嚟中原集團主席施永青、東亞銀行中國業務總部主管余學強、廣東金地律師事務所合夥人李建新及證券界名人陳永陸做嘉賓提供專家意見。
蘭西發現，今次講座原來係由漢國置業主辦，中原地產協辦。漢國置業一年前話，香港地產市場唔易做，叠埋心水返內地發展，而深圳城天地廣場發展商就係漢國置業。
蘭西
電郵地址：
