歌神許冠傑阿Sam開演唱會，佢港大同學李麗娟捧場之餘，重話畀八方知，阿Sam中英文都好叻（佢考入港大中文攞A），讀書嗰陣個人好文靜，唔多出聲，反而𠵱家喺立法會做秘書長嘅馮載祥就鬼咁活躍，成日喺荷花池攞住個結他喺度又彈又唱，真正係風頭躉。
八方向Ricky（馮載祥英文名）求證，佢話，當年佢、李麗娟、阿Sam以及立法會公共資訊總主任劉幗瑜係港大同班同學，一年級一齊修英國文學，唔知係咪全班只有佢兩個rock友，趣味相投，又玩得，所以永遠一齊坐。
Ricky形容阿Sam高大威猛，自己就細粒啲、cute啲，阿Sam上堂永不抄筆記，佢就係筆記大王，次次臨考試，佢都將筆記借畀阿Sam讀，「阿Sam好醒好叻，讀一晚就記得晒，第日考試重高分過我。」Ricky愈講愈高興，佢今晚同愛妻會去紅館捧老同學場，又有得玩，真開心。
傳真︰2623-9278
電郵︰