武打男星早排去咗北京出席一個慈善活動，公餘時候亦不忘耍樂，有晚佢同成班內地老細去咗當地一間有女陪坐嘅高級夜店消遣，點知中途又出事，搞到佢要走後門「着草」。
馮仁昭聽聞嗰晚武打男星同成班內地老細去咗北京亮馬區嘅一間高級夜店玩，當時成班男人玩得好盡興，好多人都飲到啤啤夫，有人飲大咗，重大大聲聲叫武打男星乾杯，武打男星唔肯就範，對方就覺得武打男星擺晒大哥款，一怒之下就打電話「拖馬」，隔咗十零分鐘後，竟然有成百人走落嚟踩場，好彩武打男星收風收得快，即刻走後門鬆人。
武打男星喺戲入面好似好打得，但私底下嘅佢其實就有姿勢冇實際，嗰晚好彩佢走得快好世界，如果唔係都有排煩，不過呢件事又怪唔晒佢嘅，因為類似事件喺娛圈已屢見不鮮，所以藝人都係少蒲為妙。
陳奕迅（Eason）噚日同周麗淇喺上海宣傳電影《愛．作戰》，吸引咗大批市民嚟捧場，其間市民要求Eason唱番首歌，Eason只好露番兩手，但估唔到Eason唱完之後，fans竟然連周麗淇都唔放過，要佢唱埋電影主題曲，周麗淇只好照做。有人問Eason最想做乜嘢角色時，佢就話佢最想做奸角同殺手喎！
許純美帶埋新歡林宗一去咗新加坡登台，兩個重瞓埋一張床，林宗一聲稱同床只係傾吓偈，許純美話：「我就把你灌醉來強姦你！」問林宗一唔愛許純美點解又一齊，佢話因為自己開服飾店，每月大概五萬港紙嘅生意額全靠許純美，至於揸緊嘅跑車，許純美話等林宗一同佢結婚就會過戶畀佢，原來都係為錢！
吳彥祖噚日喺灣仔幫一間燈飾店剪綵，佢話啱啱喺美國探完屋企人，重提早同爸爸慶祝父親節，送咗件衫做禮物。問吳彥祖點解唔帶女友LisaS.見家長？佢就口快快咁答話時間太短！再問吳彥祖佢媽咪有冇叫佢帶女友見面？可能吳彥祖知自己漏咗口風即刻話：「好喇！唔好講啦！」
內地噚日有報道話陳凱歌唔滿意《無極》動作指導林廸安而臨時換人，馮仁昭噚日打電話向廸安求證時，佢澄清話電影進度比原定時間遲咗好多，由於佢同陳凱歌嘅合約只係簽到今個月，而佢今個月又要去美國宣傳佢做動作指導嘅《蜘蛛俠2》，同開拍另一部電影，所以陳凱歌搵董瑋接手，絕對冇不和。
盧巧音噚日去咗商台做訪問，講到佢嘅前度男友余文樂又俾人影到同緋聞女友黃伊汶滑水拍拖，盧巧音聽到呢件事之後就話：「正常活動啫。」問到佢去滑水嘅時候有冇撞過阿樂，佢話冇印象，而且平時去滑水都淨係會留意自己啲friend，唔會理人哋喎。
S.H.E成員Selina噚日喺台灣師範大學畢業，佢喺畢業禮上重代表畢業生領唱校歌，又得到校長頒發「誠正獎章」，嘉許Selina身為學生藝人嘅優良典範，Selina話：「如果學校有一絲絲以我為榮，那是我一輩子的榮耀！」除了Selina嘅父母外，S.H.E其他兩成員Ella同Hebe更帶咗Selina偶像陶喆嘅祝福錄影帶同鮮花作賀禮。
