一年一度嘅馬匹進口許可證中籤名單噚日出咗，由於經濟氣氛好轉，再加上馬會容許馬主同時擁有四匹馬，兼且用私人及團體經理人身份入紙，結果今年收到八百四十九份申請，比去年大幅上升四成。
八方睇份中籤名單，見到演藝界嘅任達華同鄺美雲都中籤，連早前猛呻唔中籤嘅曾志偉都終於榮升馬主，另外唐英年、任志剛、許仕仁、田北俊、張宇人亦順利中籤。
中籤嘅商界名人，有鄭裕彤同明嘉福、李兆基聯名入紙，「蝦王」系劉錫康、蔡志明、郭少明、簡文樂同邢李火原，李鵬飛都榜上有名。
大家都知養馬一直係有錢人嘅玩意，但係做咗馬會會員唔代表一定可以養到馬，就好似賭王何鴻燊四太梁安琪咁，過去幾年都有入紙申請買馬許可證，之但係年年都中唔到籤！
（圖）四太（右二）又做唔到馬主，不過周三何鴻燊（左三）隻馬「走石」跑出，同騎師一齊影吓相咪一樣！
傳真︰2623-9278
電郵︰