基金睇好國企，呢輪又開始揸番重貨，好似隻兗州煤業（1171），前日已升0.3元，收7.6元，噚日一開，一眾大行已高掛8.0元「拜也」求入，晒士唔細，有百多萬股，結果就俾佢哋做起咗個勢，最低都只係造7.95元，收8.1元，大升0.5元，升幅6.5%。
兗煤造高，有利好因素支持，向日本出口嘅合同煤價傾掂，確定為每噸52美元，同比升70%，合同為期1年，由04年4月至05年3月，數量1040萬噸，相當於全年煤炭出口計劃1200萬噸的86.7%。
另外，中國的煤炭庫存量不足1億噸，係20年以來最低水平，供不應求令內銷煤價持續上升，升幅遠超過市場預期。
集團首5個月內銷平均售價係216元人民幣1噸，較去年同期高出30%。由於大型煤礦已超額生產，而供求情況仍然緊張，估計煤價仍會高企一段長時間。
今年首季，兗煤淨利潤3.92億元人民幣，升51.2%，一來係產量增加，另外亦受惠煤價上升，集團今年目標銷售4142萬噸，升5.1%。
為確保未來增長，兗煤已制訂雙線並進策略，一係投資同收購優質煤礦資產，並拓展煤炭深加工業務；二是改善經營管理，提高現有煤礦的盈利能力。
04年度（12月年結），盈利預測上調，由原估計的22億元人民幣提升到22.5億元人民幣，升62.2%，每股盈利73.5港仙，預測PE11倍，大行近期頻有報告推介買入，目標價由9.45元至9.9元不等，預期有逾20%的升幅。
兗煤走勢近兩個月形成大型頭肩底，噚日以大裂口突破頸線，同時升破50日線（7.64元）同100日線（7.86元）阻力，確認升浪再現，以量度升幅計，上升目標指向10.5元。大多數國企急跌後反彈，走勢都形成頭肩底，兗煤係少數以強勢出現突破形態的股票之一，相信亦會係最快創出新高的國企（今年4月初，股價曾升上10元水平）。
國企指數噚日創出今個升浪日中和收市新高，並升破50日線，短期上升目標指向4500至4600點，中線可見5300。
郭兆誠