反斗鱷前日中伏時，仍張牙舞爪作頑強反抗，三名從未捉過野生鱷魚的漁護署人員，用捉狗索勒緊鱷魚嘴後，就跳下泥灘徒手將牠放進撈網，過程乾淨利落，手法純熟，他們贏得了掌聲，亦贏得了捕鱷英雄的稱號；三名捕鱷英雄分別為二級農林督察陳偉正，自然護理員李觀煌及簡專慶。他們昨日下午返回山貝河現場接受傳媒訪問。
「鱷魚捉到可以鬆一口氣啦，更可以放大假去旅行囉！」第一個率先從船上跳落泥灘的陳偉正說：「乜嘢英雄呀，份內事嘅。」他表示自從反斗鱷出現後就開始調來負責巡邏捕鱷。回想前日徒手捉鱷經過，他說：「當時見到條鱷魚掙扎到冇晒力氣，我用過往捉野生動物的經驗，先用毛巾包佢對眼，因為野生動物睇唔到嘢時，情緒會穩定啲，呢個時候兩個同事又幫手，好快就將佢放入撈網裏。」
說起過去幾個月在山貝河的經歷，陳偉正表示為了捕捉反斗鱷，經常要不定時開工及收工，有時又要捱更抵夜，最難受的是親朋戚友語帶譏諷的問候：「捉到反斗鱷未呀。」「𠵱家捉到鱷魚，冇晒壓力，可以放大假陪老婆同囡囡去英國旅行囉！」陳偉正又說：「希望市民為反斗鱷改個靚名，而反斗鱷日後又帶多啲歡樂畀市民啦。」
「可以用刺激、興奮來形容自己嘅心情啦，因為自己都好似捕鱷專家一樣制服鱷魚呀。」自然護理員李觀煌說：「我太太同個仔喺電視睇到鱷魚落網後，第一時間打電話嚟恭喜我，我個仔重大聲叫老竇好犀利呀，嗰陣時我感到好滿足。」
另一位捕鱷英雄簡專慶認為捉到鱷魚算是不辱使命，「我太太、囡囡好支持我捉鱷魚，我太太成日煲湯畀我飲，就是希望我有體力及精神去對付鱷魚。」簡專慶認為幾個月來捉鱷最辛苦事情是擺置各種捕獸籠，因為經常要面對山貝河的潮水漲退，現時捉到鱷魚算是沒有白費心血，希望香港市民為反斗鱷改一個好名，更希望反斗鱷為香港市民帶來歡樂。
本報記者