記者協會噚晚搞餐舞會籌款，喺洲際酒店開足三十八圍枱，記者平日受盡唔少權貴閒氣，終於有機會一年一度可以「明屈」高官名人捐錢，民望持續喺低位徘徊嘅署理財爺馬時亨就個人表演棟篤笑，笑言多謝記協邀請佢做主禮嘉賓，事關佢民望低又只係普通官員一名，咁都獲邀真係多謝畀面，佢又話自己要封咪，不過唔係乜都唔講得，而係唔可以再同記者講賣官債嘅事，因為顧問提醒佢唔可以亂講嘢，不過佢都好識做，自動獻身捐出五萬蚊，但要記協用嚟認購債劵。
記協邀請多位嘉賓表演籌款，高潮之一係大狀梁家傑獻唱歌神名曲《浪子心聲》，梁大狀平日官仔骨骨，估唔到都有幾分歌神風範，大律師公會主席陳景生捐出二萬蚊，梁家傑開金口就籌到十萬蚊，果然係金牙大狀。
以前記協ball有名嘴毓民幫手籌款，對揼有錢佬心口幫助唔少，今年名嘴封咪，以為籌款失色，但接手嘅陸叔陳永陸原來揼有錢佬心口都有一手，陸叔話自己唔做名嘴，要做「財經演員」，因為董生好支持演藝界，佢要加入演藝人協會㖭！笑到全場反肚。結果，成晚籌咗成五十萬，成績都算唔錯。
傳真︰2623-9278
電郵︰
