山貝河鱷魚潛伏咗大半年，終於就擒。好似赤嘴劉迺強喺大陸英文《中國日報》炮轟特區政府咁講：特區政府反應緩慢，凡事都慢三拍反應。
鱷魚就擒事件，正如土共質問陳方安生點解唔遲唔早，喺六四之後、七一之前，喺《時代》周刊發表文章斥責特區有文革味，係咪想同民主派拉票同埋吹雞叫人遊行。山貝河鱷魚，出名惡捉，唔遲唔早，喺呢個時候就擒，其中亦有天機。
首先係因為佛指舍利運來特區鎮一鎮，佛祖手指豎起指一指，當堂有鎮妖止咳之效，一股佛氣有如激光，射向元朗方位，條大鱷喺水底頂唔順，卒之就要蒲頭就擒。
另外，有功嘅亦要包括埋有「中央美人」之稱嘅統戰女部長劉延東，落嚟特區，「冇時間」見民主派，不過到處活動，咀完婆婆，又抱蘇蝦。一班老左，包括亞視老細陳永棋，狂捧劉美人部長有沉魚落雁之容，閉月羞花之貌，全香港嘅左嘴一齊對住劉美人大唱情歌，凡雌性動物，都特別妒忌，山貝河底條鱷魚乸成咗精，聽見就梗係想見識吓劉部長佢靚成點，於是適時就擒，可惜畜生即是畜生，計錯日子足足有咁多日，就算蒲頭上岸，都緣慳一面，惟有第日喺濕地公園再續前緣。
呢啲科學嘅解釋，唔應該由八方公開，而係由特區政府發新聞稿公告全民，再由阿董行出嚟加兩句：全靠國家推出泛珠角九加二大優惠，先至帶挈香港捉到條大鱷，可見國家嘅威力係幾咁爆燈。而行政會議成員梁英哥亦可以在旁補充：今天我哋成功捉到大鱷，明日，到咗時機成熟，我國嘅駐港解放軍亦必將劉慧卿及湯家驊呢對反中雌雄大鱷齊齊生擒，請大家放長雙眼。
山貝河鱷魚陪咗香港人咁耐，突然間就捕，從此元朗一帶風平浪靜，好多村民話，反為唔係咁習慣㖭。呢一隻心理，亦唔難明解。香港亦有三兩條政治黑鱷，久唔久蒲吓頭，跟住又潛吓水，例如曾憲梓、鄔維庸、譚珠珠呀咁，時時飛身開口亂咁噬人。初頭佢哋嘅說話嚇港人一驚，不過慢慢市民都慣晒，就好似生香港腳，係一隻男性嘅長期癬患，長痕長𢱑，𢱑𢱑吓就感覺上好自然，若然一噴隻乜嘢劑，醫好咗，啲腳趾皮光肉滑，忽然冇得𢱑，好多時反為個心唔多自在。所以八方好希望上述諸位男女，健康長命，若然忽然間冇晒聲，反而唔似回歸後嘅特區，風平浪靜，香港人重恐慌㖭。
傳真︰2623-9278
電郵︰