有份演出無綫劇集《無名天使3D》嘅前亞視藝員甄志強（小強），最令人深刻嘅就係佢當年同富婆趙金卿嘅一段情，不過小強喺幾個月前，就被人踢爆佢同圈外富家女Carmen拍拖，當時Carmen嘅朋友睇唔過眼，話小強成日使女友錢，好似別有所圖。
前幾日小強同Carmen去九龍城補車胎，嗰日小強將架車泊咗喺路邊，一邊睇住師傅整車，一邊就踎喺街邊煲煙，佢女友就企埋一邊，無所事事咁整吓絲巾，又同車房嘅小朋友玩，小強可能見女友無聊，周不時行埋佢身邊傾兩句。
小強當時雖然一身便服，但佢依然頻頻撥弄佢把長頭髮，又係咁向女友放電，不過小強竟然趁住女友唔為意嗰陣時兩度𢱑籮，真係大殺風景。
不過好戲重喺後頭，整完車後，Carmen馬上竄入車廂攞銀包，同時間小強亦攞咗個銀包出嚟，然後極速攞咗女友畀佢嘅一百蚊，然後就好似喺自己個銀包度攞錢出嚟咁畀個整車師傅，佢嘅掩眼法咁高明，唔做藝員都可以做魔術師呀。
林心如噚日喺台灣宣傳電視劇《紫藤戀》，男主角蘇有朋喺內地做嘢，趕唔到返台灣，林心如話好失望，因為佢話自己一身嘅打扮係為咗配合蘇有朋，點知俾佢放飛機，林心如話蘇有朋下次重敢咁過份嘅話，就會爆佢啲衰作為報復喎。
王力宏今個月二十五號嘅「2004激活王力宏上海演唱會」已經落實會搵佢嘅緋聞女友張惠妹做表演嘉賓，因為內地有網友發起「反綠藝人」風潮，張惠妹早前喺青島，就碰到一班「反綠藝人」嘅群眾話要抵制佢所有活動，重會擲石仔同礦泉水作抗議，主辦單位驚演唱會時有人搞事，所以會加強保安，而王力宏就無懼因為合作再傳緋聞，佢話同阿妹喺台度合作，係一件好開心嘅事。
林曉培嘅好友張佩金𠵱家重喺上海休養，日前佢特登將自己寫畀張佩金嘅新歌《所以懂了》MV，寄畀張佩金睇，張佩金知道後都好感動，張佩金𠵱家重有唔少車禍嘅後遺症，好似每日都會頭暈眼花，而本來醫生話張佩金嘅經期要喺半年至一年後至出現，但日前佢嘅月經已經嚟咗，連醫生都話係奇迹。
有線娛樂新聞台主持陳貝兒早前訪問咗王家衞、梁朝偉同劉嘉玲，劉嘉玲透露話喺《2046》入面，本來有一場戲係佢同偉仔發展感情，但因為佢兩個完全入唔到戲，最後導演只好將佢哋改為朋友。而王家衞直認拍呢套戲壓力好大，偉仔就話覺得王菲演繹得最好，想知詳細內容，就要留意今晚播映嘅訪問片段。
