日前關之琳在上海拍戲時，與她在二十年前傳過緋聞的馬清偉在片場一旁攬頭攬頸，狀甚親暱。昨日關之琳在中環擔任一間店舖的剪綵嘉賓時，否認與馬清偉舊情復熾，並願意約對方和男友出來一齊攬。
關之琳前日剛由上海完成拍攝工作返港，昨日身穿一件低胸ＬＶ裙出席剪綵活動。
談到她在上海拍攝電影《做頭》時，馬清偉前來探班，二人更攬頭攬頸，她表示已看過報紙的報道，並輕鬆地說：「馬生同我同Jimmy（男友黃家諾）都好熟，經常有聚會，周不時食飯見面，今次咁啱Jimmy唔喺度，而我就喺馬生住嗰間酒店樓下拍戲。佢都有同Jimmy攬頭攬頸，唔通又傳佢哋gay咩？大家識咗十幾年。」
問關之琳會否擔心男友不高興？她說：「應該唔會，又唔係唔識佢，食飯都有一齊唱Ｋ，如果食飯冇帶佢（黃家諾）出嚟就話啫。呢啲普通行為，又唔係攬住錫，佢見到我時重話我咁慘、好殘、好陰功。」
問關之琳為何男友黃家諾不到上海探班，她說：「起初都有嚟陪我，不過我每日開工十幾個鐘，好忙冇機會去街食飯，佢都有應該做嘅事。」有傳馬清偉與分居妻子薛芷倫重修舊好，對此之之笑說：「冇問，就算知都唔講，人哋事唔好由我個口講。」
關之琳稱男友對她很有信心，不會因此事刻意避忌，她戲言：「佢同我講番件事重哈哈笑，我哋約埋三個一齊食飯，示範一次攬頭攬頸畀你哋睇。」
此外，昨日同場還有曾與馬清偉傳緋聞的名模陳沛嘉，她與另一名模李嘉慧及關之琳一起合照，問陳沛嘉有否尷尬？她說：「我當佢靚明星咁睇，唔明講尷尬係乜。」
採訪：魯萍 攝影：陳烱威、陳偉權
