地產多聲道:樓市腳軟業主減價

地產多聲道:樓市腳軟業主減價

樓市未見起色,發展商劈價開賣新盤,二手物業嘅業主唯有減價才能出貨。祥益地產董事盤嘉茵話,屯門新屯門中心,三座低層E室,七五○方呎,原業主一個月內降低叫價一成七,至一百零八萬,終於賣得出。
銀主都願意降價出貨,美聯助理區域經理曾慶祥話,沙田好運中心榆林閣低層B室,五一○方呎,銀主原本開價一百一十八萬,但買家出價未達要求,雙方經多次議價,銀主終願以一百零三萬成交,較開價低近一成三。銀主盤減價幅度逾一成沽貨例子,近月少見。
另外,沙田第一城四十四座中層G單位,四一○方呎,美聯分行經理鍾燕河話,原業主最初放售價一百一十三萬,後因多月未有買家問津,惟有面對現實,減價增加吸引力,最後以一百零二萬賣出單位,減幅都接近一成。

趙國雄表演貓功
長實執行董事趙國雄今晚應邀出席記協周年晚會,佢話近日忙於排舞,準備今晚獻唱貓王名曲「LoveMeTender」。噚日在宇晴軒記者會,即席表演兩下,學足貓王扭晒腰唱歌嘅功架,冇道具都可以扮彈結他,揸住支咪即場唱番兩句,真係可以順便當綵排,代理同記者就變成觀眾。
趙國雄嘅唱功,之前映灣園宣傳活動時,唱「一起走過的日子」已經見識過,至於舞姿如何,同貓王有幾多成相似,就要今晚先至知。不過佢話,顧住練舞,少練唱功。

黎處長賣樓賺錢
老牌屋苑薄扶林置富花園,一向少成交,今個月只得一宗,但幾矚目,因為賣方係入境處處長黎棟國。
世紀21分行經理彭永祥話,一座高層B,六九四呎,由換樓客用二百三十八萬購入,每呎逾三千四,高市價一成一。
據聞,黎棟國九○年以一百二十五萬買入,一直自住,早兩個月至放售,最初叫二百六萬,諗住二百五萬就賣,可能近排個市麻麻,所以減少少出貨,但仍執一百一十三萬。
彭永祥話,置富業主多自住,加上銀碼唔大,難換樓,所以出售意欲唔高。

中原內訌美聯插口
中原股東王文彥筆戰董事張奕威,就鰂魚涌太古城代理市場佔有率吹水事件,噚日再出招,強調並非針對中原,而係不滿行業歪風。兩大行當時刊登廣告,吹噓太古城市場佔有率,該屋苑係王文彥公司怡居地頭,令他特別不滿。
張奕威則另闢戰線,在專欄內反擊美聯加入論戰的文章,引資料話美聯當日在報章嘅廣告,兩日間佔有率竟跌十個巴仙,問美聯作為上市公司,是否要向小股東及客戶交代,並建議美聯一齊出來,證明成交量,睇吓邊個吹水。
電郵地址:[email protected]

趙國雄拗晒腰扮貓王唱歌,功架十足。

入境處處長黎棟國,剛沽出自住十四年嘅置富花園單位。

黎棟國