巴西唔重視美洲國家盃就係人都知，今次都唔例外，揀咗保頓同伊度等海外二線兵出征秘魯。或者有人認為係佢哋一展身手嘅好機會，但我求大俠就唔係咁諗，反而認為係嚿豬頭骨至真。
今屆美洲國家盃下個月會喺秘魯舉行，巴西教練彭利拿為咗留力打九月嘅世盃外圍賽，特准朗拿度、卡富、卡洛斯同其他世界盃老將休戰，改以史特加中堅保頓、曼聯中場基巴臣、阿仙奴中場伊度同埋國際米蘭前鋒阿祖安奴等喺球員參賽，但係，我求大俠就覺得真係搵着佢哋嚟搞。
雖則好多球會喺七月頭開操，但係，比賽同練習唔同，辛苦好多，而且個賽事喺七月六號展開，起碼要早一個禮拜歸隊，若打到尾去到七月二十五號，又要即刻返所屬歐洲球會歸隊；就算佢哋打得點好，當班主力歸隊時，就多數冇碇企。巴西呢班海外二線兵，真係俾彭利拿玩謝。
德甲聯重有兩個月先開番，但利華古遜經已走咗三件。繼紐維利同盧斯奧後分別轉投慕遜加柏同拜仁慕尼黑後，爾迪雷亦過檔柏林哈化。利華古遜下屆要踢國內聯賽同盃賽，又要分身打歐冠盃（如果可以喺外圍賽出線），家陣冇咁幾件咁有份量嘅球員，睇嚟都難有作為。
效力維拉嘅哥倫比亞前鋒安祖都算黑仔，做完膝頭手術後，個傷口俾細菌感染搞到發炎，雖則冇生命危險，但就手尾長，可能要唞一段長時間。安祖上屆喺維拉打得好好，重幫球隊喺英超聯入咗十六球㖭。我求大俠希望佢可以快啲好番，喺新一屆英超聯落場同大家見面。
前塞爾特人名宿「小鳥」布特，最近接受電視訪問時話𠵱家NBA變成黑人嘅世界，需要多番啲白人球星中和吓。點知呢度講完，轉個頭又話佢當年打波時，如果對方派白人嚟防守佢，會覺得係對佢嘅侮辱，言下之意即指白人球員技術唔掂，呢啲係唔係叫做自打嘴巴呢？
噚日台灣小將盧彥勛喺皇后會網賽爆咗大冷門，淘汰咗世界排名第三嘅高利亞，算係同華人爭光；但高利亞啱啱打完兩個禮拜嘅法網賽，立即轉打草地場，加上同大滿貫錦標失諸交臂，精神狀態同技術都有唔少不利因素，我求大俠認為向來唔擅打草地嘅高利亞輸波，唔算冷到震。