國際人氣音樂劇《MammaMia》，前晚喺文化中心開鑼，我大口羅拉同啲觀眾都睇到拍爛手掌，因為個劇成功咁將ABBA嘅名曲串成故事表演，最頂癮嘅係佢哋又着住七十年代ABBA好Yeah嘅服飾唱歌，咁啱今年係ABBA成立三十周年，所以最近重推出咗佢哋最後嘅MV作紀念。
為慶祝ABBA成立三十周年而重新拍攝嘅MV叫《OurLastVideoEver》，顧名思義，就係ABBA最後一個MV。組合早前講明唔會復合，所以片中由幾個得意嘅大頭公仔化身做ABBA成員做騷。
個MV好有故事性，入面講喺七十年代一個經理人帶住四個會唱歌嘅公仔去到唱片公司，表演畀公司老闆睇，希望博得唱片合約，唔使講佢哋梗係ABBA啦！四個公仔唔止有經理人錫，亦喺唱片公司老闆面前唱咗《DancingQueen》等ABBA名曲，冧到個老闆都忍唔住又扭又跳，實在可愛。
其實個MV裏面嘅ABBA公仔都整得維肖維妙，留心嘅話，大家重可以搵到ABBA成員客串亮相㖭。由《MammaMia》到呢個MV，再加埋最近推出嘅ABBA精選BOXSET《TheDefinitiveCollection》，呢個ABBA熱真係連我大口羅拉都擋唔住。