山貝河條小灣鱷落網，最高興嘅唔係南生圍嘅村民，而係漁護署署長陳鎮源。梗係啦，條小鱷住喺民居附近，冇事就話好玩啫，出咗事咬親人唔知邊個負責。
八方一知道捕得小鱷，第一時間打電話恭喜肥陳，佢話全靠班同事嘅努力同埋運氣，當然村民好幫手。
雖然好多人笑肥陳「守株待兔」，但係佢老哥始終相信科學方法會成功。捉到先講，班前線人員其實都好慘，佢哋要24個小時不停昅住小鱷去向，然後移陷阱到出沒之地，結果將佢捉住。
鱷魚被捕，肥陳終於可鬆一口氣，下個月放吓假。咁肥陳呢輪都算好嘢兼行運，由魚販、雞販到鱷魚都搞掂，不過，捉到嘅鱷魚只不過一條，社會上有好多「鱷魚頭、老襯底」嘅半人半鱷動物，肥陳就唔捉得咁多嘞。
（圖）小鱷落網，陳鎮源下個月可以放吓假啦。
傳真︰2623-9278
電郵︰