陳小韻上月簽約新經理人公司，短短個多月已接拍電影、電視劇、廣告及擔任商品代言人，目前已穩賺近百萬元酬勞。小韻表示希望賺錢給已破產的父親陳曜旻做生意，助他東山再起。記者卓美娟廣州直擊
陳小韻上月簽約StarPromotion經理人公司，正式由模特兒轉為全職藝人，短短個多月已接拍陳嘉上執導的電影《頭條新聞》，月中又遠赴大連接拍由《流星花園》導演蔡岳勳執導的青春劇，更一口氣接拍多個廣告及擔任多個品牌的代言人，目前累積接下的工作已賺近百萬元。
小韻日前到廣州與內地品牌「高建珠寶」簽約擔任代言人，一大早還未化妝的小韻拿着兩袋行李，單人匹馬乘直通火車到廣州，一路上她自己化妝set頭，問她是否適應一個人到內地工作？她說：「以前都係一個人喺英國讀書，又試過簽美國同新加坡嘅模特兒公司，都慣咗自己照顧自己。」
挾着父親陳曜旻昔日與章小蕙的新聞，及她與舊愛黃家諾的一段情，首次與內地品牌簽約的小韻吸引近半百內地傳媒到場採訪，更賺得數十萬元酬勞。小韻表示最擔心以國語對答，她說：「之前做模特兒可以唔使點講嘢，我係比較慢熱嘅人。」
小韻表示過去數年看着父親受感情挫折及破產，令她的價值觀有所改變，她說：「當時見到爹哋咁嘅年紀，重要面對咁多人嘅壓力，我好擔心佢承受唔到，佢係比較享受型嘅人，見到佢有咁大改變，我個心真係好唔舒服，𠵱家我努力做嘢搵錢，我唔敢話係報答佢，但我想可以有能力畀錢佢做生意，等佢搵番事業上嘅第二春！」
陳曜旻早年曾經是黑白粵語片的小生，問月中便會到大連拍劇的小韻可有請父親教路？她說：「爹哋拍嘅戲我淨係睇過一套，電視重播嗰陣我都係得幾歲，重係佢半夜叫我起身睇，覺得好好笑，不過佢都係拍咗幾套，而且呢行唔啱佢。」
