蒙牛（2319）首日掛牌上市，表現不負眾望，收4.875元，比招股價高24%。雖然蒙牛為炒新股活動打了一支強心針，但那邊廂的中海集運（2866），話就話超額認購幾十倍，但國際配售方面反應一般，據講會以下限定價，睇落有多少矛盾。
但經紀黃就覺得，咁樣未必反映中海集運冇得炒，因為定價低有較大炒上空間，現時投資者相當精明，冇水位嘅新股唔會亂追捧。
由於市況轉活，除咗新股之外，近日唔少二三線股都想做嘢。茂盛控股（022）早前公布以現金2.7至3.2億元，向大股東公路大王收購寧波北侖港高速公路44.9%股權。之後成隻股生晒，無論股價走勢同成交都相當活躍。經紀陳話，據聞近期有人想幫隻股搞批股之類嘅活動。
茂盛由月初公布收購至今，股價已由2元水平，升至噚日的2.65元。但講到批股，究竟係公司批股集資，抑係有人想批舊股，經紀陳就話未搞清楚，兩樣都有可能。
如果係批舊股，小初就覺得要小心，早排才子因為幫人打折批售茂盛，搞到被人冒充呃錢。
慕容小初