如果你係天文奇景嘅愛好者就要留意，因為國泰航空由下月一號起開辦嘅來往香港至紐約不停站直航航班，乘客會有意外驚喜。
國泰呢條航線會取道北極航道，喺九八年參與駕駛全球首班橫渡北極航道（由紐約直飛香港）嘅國泰高級副機長馬宜謙噚日喺紐約話，嗰次航班係為咗紀念香港新機場開幕，最令佢深刻係可以喺飛機上睇到北極光。佢話搭呢條新線嘅乘客，都好有機會見到北極光，同埋喺一次航程中見到三次太陽升起嘅奇景。
國泰董事兼常務總裁陳南祿前幾日率團到紐約，慶祝同推廣呢條新航線。陳南祿又到國泰同聯合國世界兒童基金會合辦嘅「零錢布施」基金嘅辦事處，向負責人頒贈由二百幾位香港年輕義工籌集嘅紀念品，以示香港青年對世界嘅關懷。基金推行到𠵱家已經有十三年，一共籌咗五千零七十萬港元。
傳真︰2623-9278
電郵︰