大事件！前晚去完「北京國際汽車展」先知帶唔夠Memorycard，10個大型場館超過57個汽車品牌、幾百架唔同型號包括多架未曝光嘅概念車實在始料不及，但失策嘅唔係影唔晒滿瀉咁多嘅靚車，而係同場火辣身材同出奇標致嘅Model都同樣滿瀉，影得車嚟無暇影靚女，實在有啲遺憾！
記者、攝影：朱維達
其實你都可以親身體驗呢次全球車壇盛事，位於北京嘅中國國際展覽中心將會於明日至6月16日開放給公眾人士入場參觀，到時你就可以近距離接觸以下介紹嘅概念車，一睹數之不盡嘅模特兒……記住帶多張card呀！
北京國際汽車展網址：
大家認識嘅豐田車中，除咗我哋喺馬路上成日見到嗰幾款，其實都有其他選擇，好似呢部PM-01，唔好睇佢好似玩具車咁，車身有1750-2650×1215×1215-1855mm，四輪獨立轉向出奇靈活，利用直流無刷電機（DCBrushlesselectricmotor）發動，全由電腦執行轉向、加速、煞車，不過可能要到我哋個孫出世先買到咯！
女士至愛！車身以鋁金屬及塑料減輕車重，表板同三人座椅都可靈活變動，3米長的座艙當然講不上寬敞（車身：3000×1600×1550mm、軸距2050mm），但總算無壓迫感，利用超薄鋰離子電池，成為日後城市日用車嘅範本。
係咪熟口熟面呢？無錯！無端端裝有兩支槍喺前面嘅當然係占士邦專用座駕啦！呢部用上6.0LV12引擎嘅超跑最大功率可去到460bhp，除配備9毫米機槍，鬼面罩處重裝有5枚地對空導彈，車頭更可隨時收摺，好誇張？唔整得誇張啲你又點會買飛入場睇？
齋睇外觀，呢部獵豹設計確實有啲粗糙，但原來呢部概念車係一班大學生嘅研究成果，4670×1860×1470mm嘅車身配合高性能鉛酸電池，發放出48V嘅電源電壓，講解人稱操控時會有靈敏表現，雖然唔算係高性能，但總算打破咗H車身嘅「現代車」格局！
同場咁多部概念車中，呢部黑貓Kiwami最型，佢係首架用燃油電池嘅轎車，以低平車身設計，除咗增加車艙空間感，操控時亦較平穩，鋁和碳素合成物令車身更輕盈，加埋四輪協調控制同前後高功率雙馬達四輪驅動系統，係名副其實有外在美兼有內涵！
縱使三菱車廠搞到滿城風雨，但佢哋嘅車款依舊貼緊市場，連概念車都追求現實，呢部4人車有一套6前速半自動波箱，3.8升V6引擎，配獨立支柱式（前）同獨立多連式懸掛（後），切合路面實際需要，而且4320×1855×1300mm嘅車身，跑門型車廂依然寬敞。
原來大陸人都興玩食字，第一次見到「長江鱘」嘅車廠已經覺得好奇怪，呢部車系叫「鱘夢」更加係絕！呢部鱘夢擁有9個獨立發光指針造成嘅大燈，裝上紅外線感應路面障礙物，而獨特的流線型車身在高速行車時，可令車身各部份都得到平均的受風度。
