港股噚日早段繼續調整，恒指曾跌逾百點，但午後回升，收市創出今浪新高（12422），升82點，成交亦去番136億元，期指繼續高水。
國指升15點，但榮辱互見，兗煤（1171）最靚，收7.6元，升0.3元，但中鋁（2600）同江銅（358）就見到大行枕住沽，前者收4.1元，跌2.9%；後者收3.35元，跌1個位。基金買國企，通常係輪流出擊，今日買呢幾隻，第日買嗰幾隻，而掃完一輪後，又會質低佢，再買過，總之，大方向都係加碼，後市睇好。
月初時話銀建（171）蓄勢待發，果然噚日發力，由1.67元搶上1.77元高收，升6%，確認突破頭肩底頸線同50日線（1.674元）阻力，且有大增2倍的成交配合，初步上升目標指向2.3元。
銀建行運，接手處理澳門的物業項目，剛剛就遇正新賭場金沙開業，成個市面旺晒，樓價上升，相信銀建好快可以做成單「刁」，除佣金外，「獎金」亦會好可觀。大股東信達手上有幾千億元嘅不良資產，銀建交得出成績，就會不斷獲得注資，一年處理一二百億元資產，佣金就有幾億元，若做得好，有獎金，盈利條數更加不得了。銀建股價今年初曾高見2.9元，下一個升浪，相信呢個價亦只係中途站而已。順帶一提，摩根大通喺本周一先增持咗488萬股。
另一隻兩個月前推介過嘅新海能源（342），噚日成交又見有異動，股價亦高收14.6仙。呢隻乃係基金愛股，大大小小加加埋埋，冇40%亦相去不遠，只要有利好消息，在一眾基金「護航」下，相信股價好大機會見2字頭。
早輪同新海計過條數，估計04年度（12月年結）盈利可達7000萬元，05年再上升至1億元，每股盈利分別係1.45仙及2仙，即使升上20仙，05年PE亦只係10倍。踏入06年，珠海碼頭擴建完成，盈利會再大幅上升。
講番摩通，本周一亦增持鎮海煉化（1128）237萬股，持股量升到1.05億股。喺周初兩日，大行確係買得好急，鎮化亦搶到上7.45元。鎮化走勢係一個大型頭肩底，周初突破頸線後，呢兩日回軟，可視為後抽，亦可趁低吸入，整固完成再升，目標指向9.2元。
郭兆誠