譚詠麟和李克勤昨日舉行簽約儀式，並各自展出二十多個獎座。會上兩人不忘揶揄環球前高層陳少寶，指早前因被廉署沒收手機而脫罪的他，現在最適合售賣咖啡和電話。
譚詠麟及李克勤昨日在尖沙嘴舉行續約環球唱片儀式，同以白色西裝亮相的兩人，提供了共四十多個獎座於商場作展覽，阿倫透露他事前花了三個星期時間到貨倉搜索有代表性的獎項，他說：「我發覺我有啲獎已經氧化咗，不過咁多個獎之中我覺得最重要係個金靴獎同埋最佳球員獎。」
克勤亦搞笑地說：「我搵搵吓發現有七、八年係冇攞過獎，中間就好似地震咁出現過斷層。」不過二人否認以千萬價續約，力稱誠意是最大的考慮元素。
阿倫及克勤透露最初與他們接洽的對口人已經不同了，他們說：「最初係陳少寶同我哋傾，𠵱家個對口人都唔同咗啦。」阿倫笑說：「人哋𠵱家搞飲食界，我重以為佢開精製咖啡店，佢間舖應該改名做ICAC，InternationalCoffeeAssociationClub。」克勤亦說：「佢係主要賣咖啡同電話，我哋去佢舖頭飲咖啡，佢就會送兩個電話畀我哋。」接着阿倫再說：「佢賣嘅係救命電話。」
大會又於現場播放了二人多年來得獎片段，包括阿倫於八八年宣布不再領獎的一刻。阿倫說：「我嗰時考慮成個月都冇同人講，嗰晚我攞最後一個獎前先同張國忠佢哋講，佢哋喊到成面眼淚，嗰晚我都喊到收唔到聲。當時我講完個迴響都幾大，我都有諗係唔係意氣用事，不過我係想樂壇有多啲新血，之後亦都有好多歌手咁做，讓啲機會畀新人，我覺得呢個現象幾好呀。」
採訪：李珮洳 攝影：仇志德
