陳慧琳（Kelly）前晚以一身價值四萬元的ChristianDior衣飾，與任賢齊出席主演的新片《大事件》首映。Kelly在戲中扮演一名女警司，最終捉拿了扮壞人的小齊，為了配合劇情，前晚Kelly便以鑽石手銬鎖着小齊到場，為現場加添緊張氣氛。
陳慧琳和任賢齊前晚乘坐一部由白色保母車改裝的警車，在多名臨時演員扮演的警察護駕下，到銅鑼灣出席新片《大事件》的首映，Kelly更以鑽石手銬鎖着小齊，來配合電影中她扮演女警司捉拿壞人小齊的情節，現場有不少Kelly和小齊的歌迷圍觀，氣氛熱鬧。
一身名牌ChristianDior打扮的Kelly，她表示身穿的全是Dior贊助，價值四萬元，雙方將有合作，但詳情容後公布，她說：「Dior準備咗三套衫畀我，但最後我揀咗呢套，我之前都有同小齊夾過着乜嘢衫，至於有乜嘢合作，等Dior遲啲公布。」
Kelly的父親前晚亦有去到捧場，可是母親和男友就沒到場，她說：「呢套戲冇親熱戲，我可以同男友一齊去睇，否則我會好尷尬。男友都會睇晒我啲戲，但就冇畀意見我。其實呢套戲喺康城都好好口碑，我都唔擔心。」Kelly昨日到北京出席奧運活動，她會與內地男高音戴玉強合唱，她說：「咪當classical同pop嘅crossover。」
在《大》片中Kelly飾演女警司，有很強的分析力，角色亦很男性化，小齊則首次扮賊，他說：「戲中我要經常同Kelly鬥智，我可以同咁靚女嘅Kelly合作，我好開心。」
小齊的歌迷已看了《大》片優先場，他說：「Fans話唔鍾意我扮壞人，女友都未見過我扮壞人，我都怕同屋企人一齊睇戲，因為佢哋會成日望住我，同埋會不停咁追問我劇情。」
採訪：馮美茵
攝影：陳慧安
