港股噚日回一回，連升3日，創出今浪新高後的正常調整而已，但大市在高位承接力頗強，恒指收市只微跌4點，成交更縮到只得99億元。期指收市12379，高水40點。
國企亦調整，國指收4284，跌27點，主要係跌中石油（857）、華能（902）同中鋁（2600）呢幾隻大成份股，但馬鋼（323）同江銅（358）個勢仍然好硬淨，不時見有大手掃貨。其實，國企見底回升到呢個水平，大行仍係不斷收集，好似石化股同資源股等，就見到佢哋好頻密嘅手影，雖然有時候會掛沽，但買盤大，沽盤小，圍起大數，都係增持。下一個升浪，除馬鋼同江銅外，鎮海煉化（1128）、兗煤（1171）、海螺（914）、中鋁同上海石化（338）等都要留意，保守估計會有2至3成的升幅。
航運業受中國宏觀調控影響，波羅的海乾貨指數在今年2月初升到5681的歷史高位後，大幅回落到3060點水平，跌幅超逾46%，而預期04年（12月年結）盈利會以倍計增長的金輝集團（137），股價亦急挫，噚日收14.8元，同今年2月底的高價40.2元相比，大跌63%。除宏調引致貨運市場一片恐慌外，油價高企令成本上升，亦引起投資者憂慮。
運費大幅回落，可視為急升後的調整。由於市場預期中國經濟可軟着陸，而近期原料價格回穩亦顯示中國對進口商品仍有強勁需求，若波羅的海乾貨指數在今年稍後時間回升，則「跌過龍」的金輝就會大幅反彈，若其股價回落到14元或以下水平，更值得一博。
今年首季，金輝附屬奧斯陸上市公司JST，營業額5478萬美元，升136%，獲利2812萬美元，大升40倍，第2季業績增長肯定會放緩，至於下半年表現則要視運費能否回升而定，但以波指3000點計算，仍比過去10年平均的1600點超出甚多。
金輝去年營業額10.48億元，升39%，獲利3667萬元（02年虧損6233萬元）。今年經營情況出現大波動，保守估計盈利由5.6億元調低至3.6億元（仍大增近9倍），每股盈利6.8元，現價PE只係2.1倍。運費若回升，金輝PE上番4倍，股價已可見27.0元。
郭兆誠