又到端午佳節，不過特區冇錢，今年國際龍舟邀請賽可能因籌唔夠錢無得搞，又或者鬼佬龍舟好手對特區呢個自稱嘅「國際都會」得啖笑而你請佢佢都唔嚟，媽田噚日喺立法會辯論中，好豪氣咁話：「我個人用白鴿黨名義捐十萬搞龍舟！」媽田同八方講，希望用佢嗰十萬蚊拋磚引玉，等啲叠水嘅立法會同事，好似田少、寶baby同埋梁劉柔芬一齊捐。
負責答辯嘅官員冬冬話，感激媽田有實質行動，肯捐十萬蚊咁多，希望各商業機構可以出吓心支持一下，呢個有錢貼一億「維港匯」嘅政府有足夠資金一兩百萬搞龍舟。至於身家數以億計、擔任特區半個體育部長嘅Timothy霍，就無媽田咁熱心，八方問佢捐唔捐錢，佢淨係講會支持，唔肯答係咪會捐。一試就試出邊個係假愛國，邊個係真愛港。
（圖）媽田捐十萬出嚟搞龍舟比賽。
傳真︰2623-9278
電郵︰