現年十七歲嘅水着新人岩佐真悠子，出道冇幾耐又上電視節目又拍廣告，喺日本藝能界都算發展得唔錯，我羅拉睇見都戥佢開心。岩佐會喺嚟緊月尾推出新嘅DVD同錄影帶，接住重有一連串嘅宣傳活動，同班fans見吓面咁話。而佢有份主演嘅電影遲啲重會喺日本上映，睇嚟佢今個炎夏都有排唔得閒。
最近日本雜誌《Flash》就搵咗好多岩佐嘅童年相出嚟，我羅拉梗係要畀大家睇吓啦！最過癮嘅都算係佢嗰張眼仔碌碌露兩點嘅BB仔相，肥嘟嘟周身肉，係人見到都想搣兩吓。
原來細細個嘅岩佐已經好open，好鍾意同同學仔去郊外旅行，佢同班同學仔重玩得好開心！岩佐又自爆佢嘅初戀喺小學二年班時發生，對方係一個比佢大兩歲嘅男仔，真係人細鬼大呀！
踏入中學階段嘅岩佐，着住套齊齊整整嘅校服，睇落又幾清純喎！咪睇平日着慣一身性感水着拍寫真嘅岩佐咁野性，原來佢中學時代曾經係學校管弦樂團嘅代表，負責吹小喇叭，而且重幫學校攞過唔少校際音樂獎㖭，認真巴閉。