陳太喺《時代》周刊一篇良心諍言，取態溫和，對中央政府勸諫，苦口婆心，點知咁都不見容於土共。曾憲梓又撲出嚟嚙咬，話陳太「興風作浪」。
何謂「興風作浪」？曾憲梓、鄔維庸呢一撮，一時又話香港人食狗餅，一時又話呢個漢奸嗰個港獨，又算唔算興風作浪？呢一類老人癡呆症式嘅語言，駁佢都多餘。
有啲親中人物如劉迺強，就咬實一樣：陳太係前政務司司長，根據「殖民地傳統」，離任之後唔可以說三道四，發表言論，更加唔應該喺美國《時代》周刊寫文章。
離開咗官職，就唔可以發表意見？八方係咁意一數，類似陳太咁，退休或辭職，繼續就香港政局「說三道四」嘅前政府官員，就有以下各個先例（排名以級數分先後）：
一、前布政司鍾逸傑，最近建議政制改革可以參考英式嘅「上下議院制」。鍾叔重出版巨著《石點頭》，評述管治香港嘅心得，由港大出版社打正旗號出版，中譯由人稱才子嘅陶傑執筆，打正旗號，對香港政治公開說三道四。
二、前民政事務局局長藍鴻震，人稱藍爺，離職後經常在某知識分子報章撰文論述政局，重身體力行，成為政治組織「新世紀論壇」核心人物。
三、前廉署行動組徐家傑，離職後日日寫專欄批英，佢老哥遭受肥彭「政治迫害」而燉冬菇，咁嘅立場，人人可以理解。
四、前民航處處長樂鞏南，寫專欄，長期咒罵其前度上司陳方安生及民主派人士，並呼籲中方拘捕名嘴鄭大班及黃毓民，「治以應得之罪」，可謂狼過華秀隻狗，可惜雖然瞓身到盡，至今未獲中方垂青重用，希望佢繼續努力。
以上各人，全部以退休官員身份「干預」特首施政。重未計前新華社社長周南，最近喺中方喉舌《紫荊》撰文大罵民主派。重未計美國前副總統戈爾，多次抨擊布殊無能。退休官員，行使言論自由，可見中外都天公地道，人人都講得，獨陳太唔得，即是歧視女性，呢種人潛意識中仇恨婦女有知識，所以陳太成為受抹黑圍剿目標。
點解喺《時代》周刊發表？辦報刊，亦係一盤生意，陳太嘅言論，可以吸引讀者，有銷路，《時代》周刊自然搵陳太寫。若然樂鞏南之流可以向《時代》周刊自薦，人哋唔將佢啲稿投籃，佢哋亦可以賺美金稿費，自由世界，搵錢自由，有興趣寫作嘅文藝青年，人人都可以向《時代》周刊編輯探路。
至於人哋點解只搵陳太，咁就有如荷李活同歐洲，點解只搵周潤發同張曼玉拍西片，睇中嘅唔係黃夏蕙？你問八方，八方都𢱑晒頭，或者黃夏蕙肯在荷李活片中大膽演出，都會有票房嘅。
傳真︰2623-9278
電郵︰
