紅遍日本嘅女子十二樂坊，呢隊演奏中國樂器嘅女子組合認真唔嘢小，噚日佢哋喺尖沙嘴一間餐廳搞咗個簽約儀式，成為EMI旗下嘅組合，十二個女仔重即場露兩手，一口氣表演咗三首樂曲，令在場嘅人都歎為觀止。
有傳佢哋係俾EMI由環球高薪挖角過檔，佢哋十二個女仔就話唔知咁多，因為係由經理人代佢哋傾，講到最近有一隊「芳華十八」，又係好似佢哋用中國樂器演奏音樂，十足佢哋嘅翻版一樣，女子十二樂坊就話佢哋知道有呢隊組合，不過就未睇過佢哋嘅表演。
女子十二樂坊又話其實佢哋成功咗之後，都有唔少好似佢哋咁嘅組合出現，佢哋忠告呢啲組合唔好淨係模仿人哋，而係希望佢哋可以將中國音樂發揚光大。人紅咗講嘢係唔同啲，佢哋遲啲重會去歐洲表演，都咪話唔威。
黃貫中（阿Paul）噚日到商台接受訪問，前Beyond成員劉志遠都有出現同佢一齊jam歌，講開今日係黃家駒生忌，阿Paul就話會約埋黃家強同葉世榮去拜祭，而呢個係佢哋一年一次嘅聚會，大家已經好有默契，阿Paul重話自己成日都掛住家駒。
英皇旗下嘅MusicPlus揸弗人甘菁菁離職後，最近俾商台招攬做叱咤903總監一職，噚日馮仁昭打電話恭喜佢，甘菁菁話：「下個禮拜一就正式返工，做電台工作我係頭一次，係一種新挑戰。」除咗佢轉新工之外，聽聞佢老公黃劍濤亦就快離開MusicIcon，去正東唱片做揸弗人。
髮型師KimRobinson噚日被指拖欠兩個課稅年度薪俸稅，合共三千六百多元，遭稅局入稟區域法院追討有關欠款連利息同堂費。稅務局長喺入稟狀中指出被告人KimberleyCraigRobinson，喺今年四月三日仍欠交二○○二年至二○○四年兩個課稅年度，合共三千六百五十六元稅款，現入稟追討有關款項，連同利息同堂費。 案件編號：DCTC7643/2004
張文慈、陳煒同楊崢噚日喺跑馬地出席《2003/2004年度香港賽馬會冠軍人馬獎》宣傳活動，三個靚女均以性感打扮到場。有雜誌拍得張文慈同吳廷燁去大潭玩wakeboard，懷疑兩人拍拖，張文慈話：「我哋只係識咗好耐嘅朋友，佢好多女朋友，個個都好靚㗎，我哋嘅感覺就好似兄弟咁。」
