阿根廷近兩輪世界盃外圍賽只得一分，球迷當然唔收貨，更掀起一股倒教練比爾沙嘅浪潮。近日有阿根廷球迷整咗個網站，希望趕比爾沙落台。另外，連以前明撐佢嘅阿根廷足總都話，只要比爾沙肯落台就隨時易帥。搞到咁，怕且比爾沙都無癮啩。
據報指，截至星期二已經有成五千個球迷Click入過呢個反比爾沙嘅網站
對比爾沙嚟講，最傷心莫過於足總主席格當拿都話，如果比爾沙肯辭職，就即刻委任小保加教練比安基。連人選都有埋，比爾沙冇碇企囉。
有關拉素教練文仙尼將會過檔國際米蘭嘅消息，連意大利傳媒都寫到悶晒，但一直只聞樓梯響。拉素總監迪米達終於忍唔住，要求文仙尼盡早表態肯唔肯留任。又係嘅，祖雲達斯、AC米蘭已火速組軍，而拉素連教練係邊個都未知，到下個月初就大圍開操，唔通到時至搵新教練？
意甲AC米蘭有意簽朗拿甸奴言猶在耳，所屬球會巴塞隆拿隨即宣布為「細哨」大幅度加薪五成，由原來三百萬歐元年薪加到四百五十萬，同時又將佢個合約買斷價提高。此舉固然令「細哨」受惠，而巴塞隆拿如果賣走佢，叫價又可以高啲，真係一家便宜兩家着囉。
眾所周知，湖人教練積遜個女友珍妮係湖人大老闆畢斯個千金，噚日佢喺電台接受訪問時揚言話積遜下季九成半續留湖人，似乎不捨得愛郎離她而去。難得伊人情心如此，積遜何不順水推舟，下季續留湖人，話唔定遲啲同珍妮拉埋天窗後，積遜自己做埋湖人嘅老細都唔奇！
喺早前法網賽首圈出局嘅阿加斯，噚日又喺皇后會網賽首戰出局，呢位老將連續喺三項單打賽首戰敗陣；阿加斯疏於操練，狀態又麻麻，唔怪之得廣泛傳媒都估呢位三十四歲名將就快掛拍；其實佢要贏嘅已經贏晒，家財萬貫兼有個幸福家庭，都係時候退落嚟享吓清福啦！