市場焦點集中在新股方面，令到大市噚日水靜鵝飛，恒指兩度上試12420均無功而回，收市倒跌4點，報12339，成交不足100億元。
蒙牛（2319）今日掛牌，市傳暗盤價5元，似乎有炒味。阿虎噚日買咗包蒙牛試飲，發覺味道唔錯。不過，飲完之後都係覺得無謂長揸此股，有錢賺就應該沽貨走人，一來冇人知道國內幾時會發生瘋牛症，加上現時國內咁多假貨兼有毒食品，做食品飲品生意嘅，似乎多一重風險。
大摩力捧駿威（203），但股價只反彈1.6%至3.225元。華晨（1114）再跌1.9%，收2.65元。大摩今次支笛似乎威力有限。
生命科技（1180）近期頻頻入市回購股份以支持股價，令股價由0.16元水平回升至逾0.18元。生命科技有隻公司輪1074，上市未夠半年，而上市之後似乎冇乜人吼，持續在7.8仙發行價附近徘徊。公司終於有行動，以每份7.4仙回購100萬份，刺激隻輪噚日上升12%至8.4仙，溢價仍低至1%。不過，成交仍然不振，僅3360元，相信好難吸引散戶注意，睇嚟公司久唔久就要入市回購支持。
民間人權陣線預期七一將有30萬人上街，阿虎同黑客打賭肯定冇咁多人，點知喺呢個時候，爆出阿董涉嫌減價賣地畀電視廣播（511），浪費納稅人金錢事件。香港市民過去一直唔滿意政府處事不公及浪費公帑，若果事情鬧大，搞到超過30萬人上街，咁阿虎呢一次真係輸得唔抵。
電視廣播噚日股價企硬，收報33.40元，升0.3%。睇嚟冇人相信政府會迫佢嘔番近5000萬元地價。
阿虎