午飯時分，大家談天說地，話題雖然廣闊，但今時今日，少不免會觸及普選、政改、民主是否有利香港等問題，不講猶可，一講就好分化，好容易演變成兩派大戰。譬如譚惠珠話：「打開報紙，無人因為雙普選遭否決而燒炭自殺。」後來佢又加番幾句：「我不是叫人燒炭自殺，完全冇咁嘅意思……」大家評論譚惠珠呢句說話，咪即刻出現火爆場面囉。
左丁山叫財務M唔好講政治，以免影響食飯氣氛，佢就講不是笑話的笑話：「唐司長帶領富豪去東三省視察，我敢批死，人人去旅遊，冇人願投資。我自己去睇過晒，當地環境唔適合香港商家嘅。我哋公司想話投資中藥發展，有人帶我去睇人參種植區，一步一驚心，因為人參區外就係地雷區，你話在人參區外布雷，係乜原因嘞，就係賊多囉。」
中貿林唔同意，佢最近去過大連、旅順，發覺市面繁榮到極，零售業十分興旺，照計香港人上去投資，有得做喎。兩位仁兄講嘅，係唔同層面，中貿林觀察無誤，財務M亦有道理，現實係即使當地經濟環境好，外地人去貿易，正是猛虎不敵地頭蟲，好容易俾本地人食咗，外地人未交過沉重學費，咪旨意想發達。
財務M就話：「香港富豪未必肯交學費，除非中央出手，扶一把啦，唐司長已經講得好清楚，東北地方，收數唔易喎！」香港富豪個個精叻過人，大家聲勢浩蕩去行大西北，返到嚟咪無影無蹤！