個市反反覆覆，恒指埋單微跌4點。中銀（2388）跌15仙，拉低恒指5.1點。若非中銀回落，指數則唔使負啲啲。個市反覆一輪，藍籌反覆一輪，勢頭都重係向上，藍籌股若然再跌些少，吼吓相關Call輪有着數。
中銀若跌到13.20元，買Call輪，正路對象係9169，明年2月到期，輪價18.1仙，溢價4.7%，槓桿率7.5倍。另1件9346係鎖定回報輪，有大成交，短炒唔使太計較啲數據，昨收13.3仙，跌0.2仙，有133球易手。另一隻熱門，比較近期嘅Call輪9218，9月尾到期，輪價6.7仙，溢價7.4%，槓桿率20.2倍；撞正正股郁得好多，隻輪波幅會好大，但正股通常動作唔大，隻輪唔值得有咁高溢價，炒中銀Call輪咪搞呢件。
平安保險就快招股，對啲國內保險股會有啲刺激，不過要提防啲新聞出晒嗰陣，啲保險股會有回吐。國壽（2628）平收4.60元，如果未來幾日，國壽繼續升，咪搞啲Call輪，如果先行回吐，則揀定啲Call輪上車，正路對象係9822，9月夠鐘，輪價56仙，溢價10%，槓桿率8.2倍，溢價唔低，適宜炒而唔適宜揸。
德昌（179）派成績表後，雖然賺少22%，但已屬事先張揚，股價再升，收7.85元，進帳15仙。德昌Call輪，好少選擇，可以諗嘅係窗口定界輪9983，壽命唔短，11月夠鐘，有機會低買，高追則不宜。
章盛