飽歷過經濟低迷，消費者變得更精明，購物宗旨是平、靚、正！所以為公為私，我每個月至少行三、四轉十元家品店，而每次都必定有收穫。今次就搜羅一堆可以將家裏雜物擺放得井井有條的$10家品，大家又睇吓啱唔啱使？
記者：招佩珊
攝影：林栢鈞
Model：Suki（RichStrategy）
以種類及數量來計算，廚房可算是堆存雜物的「重災區」，何況，食物、廚具及調味料等各類物品體積有異，要擺放得井井有條，可靠以下「小道具」將大堆頭的零散雜物集中收納。
一般都會將碗碟叠高一戙戙放入櫃，但易有碰撞！不妨將飯碗放入膠筒內，防撞之餘，成個膠筒拎起，易過下下要雙手將一戙飯碗抬上抬落。
浴室內的雜物，以護膚品及清潔劑為主，要在有限的空間擺放大支細支護膚品及清潔劑，當然要識得偷位。
長身衣櫃得一條鐵通，掛衫集中在上面，下面則空蕩蕩，那麼，怎樣處置愈買愈多的衫褲？
客廳物件雜亂無章，以上的十蚊兜多數細細件，未必啱廳使！但稍動腦筋，將幾件十元家品Mix&Match，就變得好使好用。
$10一個層架沒啥特別，但將幾個層架叠起就變成多層組合架，按需要自行決定叠高定叠矮，而且做法簡單，用尼龍紮線帶索緊便可。
原本是個餐碟木架，但只要將它垂直放並固定在廳中的矮櫃旁，便變作一個DVD架；再轉一轉打橫放，更可用來擺放多個遙控器，一架多用。
小秘技
吉之島$10廣場及崇光超市$10店均是$10家品的入貨主要地點，而吉之島$10廣場貨品種類最多，而且分店多，包括銅鑼灣、將軍澳、黃埔及屯門等；另外，日本城及實惠亦可找到些$10或以下的家品。而家品除可單件獨立使用，買多幾件可變成不同組合，如上述的客廳層架或廚具掛架，大家不妨動動腦筋Mix&Match。
