港島甲級商廈買賣熾熱，十幢成交最多的商廈，頭五個月有逾百三宗成交，較去年全年多五成八；樓面四十八萬五千呎，增一成半；總值勁增八成四，有二十六億。
屋之島董事總經理黃志強話，一向炒風甚盛的金鐘力寶中心，交投最活躍，有四十六宗，樓面八萬三呎，係各商廈之冠。原因應是較多細碼。
不過，論到總值，力寶只係排第二位，得四億六，有點令人意外。第一位原來為上環信德中心，佔五億五，估計係有大手成交有關。黃志強認為，因為樓市進入鞏固期，預期下半年市道只會平穩發展。
另外，乙級商廈市場有業主願意提供短成交期沽售單位，中原高級營業經理陳叔仲透露，威靈頓街翡翠中心十七樓全層，一八三六呎，以近四百四萬交吉易手，成交期僅六周。
兩位資深投資者陳清白同黎汝遠，繼上周捧美聯場睇跑馬之後，噚日又雙雙出席美聯將軍澳廣場分行開張，黎汝遠做埋剪綵嘉賓。
兩人捧美聯場，不過對於嗰區物業投資潛力，就一啲都唔捧場，有彈冇讚。
黎汝遠話，唔熟將軍澳，入市興趣唔係冇，不過要先了解，短期內唔會買住。至於陳清白，就更加毫無保留話，呢區供應太多，短炒未必有水位，只因捧朋友場先至嚟，就算日後有機會買，都會先做考察。佢話唔熟嗰區好難搞，信晒班代理好危險。
政府下周拍賣市區土地前夕，有上市發展商睇好後市，先入貨等升市。
興勝創建（896）上個禮拜以屋地方式，購入九龍塘書院道四號，噚日再下一城，買埋隔籬秀竹園道二十一號，兩幅地可合併一齊發展。
中原地產梁瑋麟話，剛賣出的秀竹園道屋地，成交價二千五萬，以樓面四五二○呎計算，呎價五千五百幾，造價唔錯。
興勝創建唔知係咪睇好賣地成績，預早入市。
原業主今年二月以千九萬買入，地皮四個月升值三成二。
本港係美食天堂，吸引各方飲食集團來港開舖，早兩年多內地食肆進軍本港，最近則有新加坡飲食集團，買舖作旗艦店，一口氣用五千六百五萬，買入屯門三聖街海天花園酒家舖址，自行經營食肆，罕見之餘，又豪氣。
中原董事許偉文話，舖位其實係三層高村屋，但地契只限不可作工業用途，樓面兩萬四呎，另包括向政府租用的四萬五呎花園及停車場，買家計劃斥三千萬重新包裝，經營中式食肆。原來買家在港早有投資物業，今次看中海天花園酒家個名，所以連品牌一併購入。
海天酒家已有二十多年歷史，原業主九○年用逾三千三萬買入上址，經營至今。
蘭西
電郵地址：